ინტერნეტში ვირუსულად გავრცელებული ფოტო, რომელიც 14 მარტს ფეისბუქ მომხმარებელმა Karen Collins-მა გამოაქვეყნა, კორონავირუსზე ახალი კონსპირაციის საფუძველი გახდა. ფოტოზე გამოსახულია სარკინიგზო ტანკერი, რომელსაც COVID-19 აწერია. პირველწყაროს მითითებული აქვს, რომ ფოტო ამერიკის შეერთებულ შტატებშია გადაღებული.
ფოტო: Snopes.com
ფოტოს გამოყენებით გავრცელდა კონსპირაცია, რომ ტანკერს ვირუსი გადაჰქონდა, რაც იმ ყალბი ამბების გაგრძელებაა, თითქოს კორონავირუსი ხელოვნურად შექმნილი ბიოლოგიური იარაღია.
გავრცელებული ფოტო Snopes-მა გადაამოწმა და განმარტა, რომ სარკინიზო ტანკერებს ამერიკული რკინიგზის ასოციაციის მიერ მინიჭებული აქვთ საიდენტიფიკაციო ნომერი, რომელიც შეიცავს ორიდან ოთხამდე ასობგერასა და მაქსიმუმ ექვსნიშნა რიცხვს. ამერიკული ტანკერი გამოიყურება შემდეგნაირად:
ფოტო: Snopes.com
როგორც Snopes აღნიშნავს, ფოტომანიპულაციასთან გვაქვს საქმე, რადგან COVID-19 არ ჯდება საიდენტიფიკაციო ნომრის სტანდარტებში. ამასთანავე, აბსურდულია, რომ ვინმეს ვირუსი რკინიგზის საშუალებით შეუნიღბავი ტანკერით გადაჰქონდეს.