Polygraph.info-ს მასალის მიხედვით
9 აპრილის ბრიფინგზე რუსეთის საგარეო საქმეთა სამინისტროს სპიკერს, მარია ზახაროვას, დაუსვეს კითხვა ამერიკის შეერთებული შტატების სახელმწიფო დეპარტამენტის გადაწყვეტილებაზე “რუსული იმპერიული მოძრაობის” გლობალური ტერორისტული ორგანიზაციების სიაში შეტანასთან დაკავშირებით. ზახაროვამ განაცხადა, რომ აშშ-ის გადაწყვეტილება ორმაგი სტანდარტების მაგალითია, რადგან გაურკვეველია, თუ რა ნიშნით აღრიცხავენ ტერორისტულ ორგანიზაციებს, როდესაც ვაშინგტონი უკვე დიდი ხანია უარს ამბობს ISIS-ის შეყვანაზე ამ სიაში. ზახაროვამ ასევე აღნიშნა, რომ ვაშინგტონის გათვლებით ეს სტრუქტურა შესაძლოა სასარგებლო იყოს სირიის ლეგიტიმური ხელისუფლების წინააღმდეგ საბრძოლველად.
მსგავსი განცხადება რუსეთის საგარეო საქმეთა სამინისტროს ტვიტერის ოფიციალურ გვერდზეც გამოქვეყნდა.
ზახაროვას განცხადება, თითქოს აშშ-ს ISIS ტერორისტულ ორგანიზაციად არ ჰყავს გამოცხადებული, ტყუილია. აშშ-მა ეს ისლამური დაჯგუფება ჯერ კიდევ 2004 წელს შეიყვანა ტერორისტული ორგანიზაციების სიაში.
აღნიშნული ტერორისტული დაჯგუფება 1999 წელს აბუ მუსაბ ალ-ზარქავმა შექმნა. 2004 წლის 17 დეკემბერს კი აშშ-მა ახლანდელი ერაყისა და ლევანტის ისლამური სახელმწიფო, რომელიც ადრე ერაყის ალ-ქაიდას სახელით იყო ცნობილი, ტერორისტული ორგანიზაციების სიაში შეიყვანა.
აშშ-ის შეიარაღებული ძალები 2004 წლამდეც ებრძოდა ISIS-ის წინამორბედს, ხოლო 2011 წელს, როდესაც ისლამური სახელმწიფოს ტერორისტული ორგანიზაცია გაფართოვდა, ის უკვე აშშ-ის ტერორისტების სიაში იმყოფებოდა. ამასთან, ზახაროვას მტკიცება, თითქოს აშშ ისლამურ სახელმწიფოს სირიაში ბაშარ ალ-ასადის რეჟიმის მეტოქედ ხედავდა, ეწინააღმდეგება ისტორიას. 2010 წლიდან აშშ ებრძვის ISIS-ს და მოკლული ჰყავს ტერორისტული ჯგუფის არაერთი ლიდერი, მათ შორის ალ-ზარქავი 2006 წელს, 2010 წელს აბუ ალ-მასრი და აბუ ომარ ალ-ბაღდადი, 2019 წელს აბუ ბაქრ ალ-ბაღდადი.
2014 წელს, როდესაც ისლამური სახელმწიფო გაძლიერდა და ტერიტორიები მიიერთა ირაყსა და სირიაში, აშშ-მა მის დასამარცხებლად შექმნა ათეულობით ქვეყნისგან შემდგარი გლობალური კოალიცია. კოალიცია დღესაც მოქმედია და 82 წევრი ჰყავს.
“რუსული იმპერიული მოძრაობა”, რომლის ტერორისტულ ორგანიზაციად ცნობა და სიაში შეყვანა აშშ-მა 2020 წლის 7 აპრილს გამოაცხადა, იბრძოდა დონბასის რეგიონში, რუსული შეიარაღებული ძალების რიგებში, უკრაინელების წინააღმდეგ. მართალია არ დასტურდება, რომ “რუსულ იმპერიულ მოძრაობას” შესაძლოა რუსეთის მთავრობა აფინანსებდეს, თუმცა კრემლი მათ საქმიანობას ხელს არ უშლის.
